ഇന്ത്യൻ സ്മാർട്ട് ഫോൺ നിർമ്മാതാക്കൾ എവിടെപ്പോയി ?

ലോകത്തിലെ ഏറ്റവും വലിയ രണ്ടാമത്തെ സ്മാർട്ട് ഫോൺ വിപണിയാണ് ഇന്ത്യയുടേത്. 2019 ലെ Q1& Q2 കണക്കുകൾ പ്രകാരം ഇന്ത്യൻ സ്മാർട്ട് ഫോൺ വിപണിയുടെ 60 % ശതമാനത്തിനു മുകളിൽ കൈയ്യടക്കി വച്ചിരിക്കുന്നത് ചൈനീസ് സ്മാർട്ട് ഫോൺ നിർമ്മാതാക്കളാണ്.

ഏറ്റവും കൂടുതൽ വിൽപ്പന നടന്ന 11,000 രൂപ മുതൽ 18,000 രൂപ വരെയുള്ള ഫോണുകൾ വിപണിയുടെ 33 % വും കയ്യടക്കി. ലോക വിപണിയുടെ ആദ്യ മൂന്നു സ്ഥാനക്കാരിൽ നിൽക്കുന്ന ആപ്പിളിനും, വാവേ (ഹോണർ) ക്കും വിപണിയുടെ 3 % താഴെ നിന്നുകൊണ്ട് തൃപ്പ്തിപ്പെടേണ്ടി വന്നു.

ഒരു പക്ഷെ ആൻഡ്രോയിഡിൽ നിന്നും റൂട്ട് ചെയ്യപ്പെട്ട ഹൈടെക് ഓപ്ഷൻസ് ഉൾപ്പെടുത്തിയുള്ള ചൈനീസ് സ്മാർട്ട് ഫോണുകൾ ഇന്ത്യയിലെ ജനങ്ങളിൽ വലിയ അളവിൽ സ്വാധീനം ചെലുത്തുമ്പോൾ കൈമാറ്റം ചെയ്യപ്പെടുന്ന ഒട്ടനവധി വിവരങ്ങൾ, വ്യക്തികളുടെ സ്വകാര്യത, ബിയോമെട്രിക് വിവരങ്ങൾ, ബാങ്കിങ്ങ് ഇടപാടുകൾ ഇവയുടെ എല്ലാം സുരക്ഷ ഉറപ്പുവരുത്തേണ്ട ബാധ്യത കൂടി സൃഷ്ടിക്കപ്പെടുന്നു

പക്ഷെ ഇവയിലെല്ലാം ഒരു ചോദ്യം നിഴലിച്ചു നിന്നു,

2013 മുതൽ 2015 വരെ വിപണിയുടെ 50 ശതമാനത്തോളം കയ്യടക്കി വെച്ചിരുന്ന ഇന്ത്യൻ കമ്പനികൾ എവിടെപ്പോയി ?  

മൈക്രോമാക്സ്, ലാവ, സോളോ, കാർബൺ, സ്പൈസ്, ഇന്റക്സ് തുടങ്ങി നമുക്ക് സുപരിചിതമായിരുന്ന ധാരാളം ഇന്ത്യൻ കമ്പനികൾ .

പക്ഷേ, ഈ കമ്പനികളെല്ലാം ഇന്നത്തെ സ്മാർട്ട്‌ഫോൺ വിപണിയിൽ നിലനിൽപ്പിനായി കിതക്കുന്നു. ഈ കമ്പനികളെല്ലാം 2014 ന് മുമ്പ് മികച്ച ലാഭത്തിൽ പ്രവർത്തിച്ചിരുന്നു. 2013-2015 കാലയളവിൽ ഇന്ത്യൻ കമ്പനിയായ മൈക്രോമാക്സ്  കൊറിയൻ കമ്പനിയായ സാംസങിനെ പിന്തള്ളി ഇന്ത്യയിലെ ഒന്നാം നമ്പർ സ്മാർട്ട്‌ഫോൺ കമ്പനിയായി.

മൈക്രോമാക്സും കാർബണും അക്കാലത്ത് ഇന്ത്യയിലെ മുൻനിര സ്മാർട്ട് ഫോൺ  കമ്പനികളായിരുന്നു.  ഈ കമ്പനികൾ സ്പോൺസർ ചെയ്ത നിരവധി ക്രിക്കറ്റ് പരമ്പരകൾ നമുക്കറിയാം. ശരിക്കും ഈ വർഷങ്ങൾ ഇന്ത്യൻ സ്മാർട്ട് ഫോൺ കമ്പനികളുടെ സുവർണ കാലഘട്ടം എന്നു തന്നെ പറയാം. ഇന്ത്യയിൽ, ഷിയോമി, ഓപ്പോ, വിവോ എന്നിവ പ്രാരംഭ ഘട്ടത്തിൽ മാത്രമായിരുന്നു അപ്പോൾ.

"Take India Online" എന്ന ആശയത്തിൽ വന്ന Android One നിരയിലെ ഫോണുകൾ ഈ കാലഘട്ടത്തിൽ ഇന്ത്യൻ കമ്പനികൾക്ക് നല്ല കുതിപ്പു നൽകി.

പക്ഷെ 2014 മുതൽ 2019 വരെയുള്ള കാലങ്ങൾ ഇന്ത്യൻ കമ്പനികൾക്ക് ഒട്ടും തന്നെ ശുഭകരമായിരുന്നില്ല. 2014 ലെ മുൻനിര 5 കമ്പനികളിൽ നിറഞ്ഞു നിന്നിരുന്ന ഇന്ത്യൻ  കമ്പനികൾ 5 വർഷങ്ങൾക്കിപ്പുറം 2019 ആയപ്പോഴേക്കും അവസാന 5 ഇൽ ഇടം ലഭിക്കാൻ മത്സരിക്കുന്ന കാഴ്ചയാണ് കാണേണ്ടി വന്നത്.

(NOTE: OTHERS (2019) - APPLE, LENOVO, MOTOROLA, LG, GOOGLE, ASUS, ONE PLUS, ETC.)

എന്തുകൊണ്ട് ചൈനീസ് കമ്പനികൾ ?

ചൈനീസ് സ്മാർട്ട്‌ഫോൺ നിർമ്മാതാക്കൾ നിരവധി അനുകൂല ഘട്ടങ്ങളിലൂടെയാണ് ഈ അടുത്ത കാലം വരെ കടന്നു വന്നത് . 

ഒന്നാമതായി, ചൈനീസ് ഗവൺമെന്റിന്റെ അകമഴിഞ്ഞ പിന്തുണ. ഉദാഹരണത്തിന്, ഇലക്ട്രോണിക്സ് നിർമ്മാതാക്കളെ പരിപാലിക്കുന്ന ഉദ്ദേശ്യത്തോടെ നിർമ്മിച്ച നഗരമായ ഷെൻ‌ഷെനിലെ നിർമ്മാണ ഇൻഫ്രാസ്ട്രക്ചർ ഉപയോഗിക്കാൻ അവർക്ക് കഴിഞ്ഞു, അതിനാൽ വളരെ കുറഞ്ഞ ചെലവിൽ മുൻ‌നിര നിലവാരമുള്ള സവിശേഷതകളുള്ള സ്മാർട്ട്‌ഫോണുകൾ നിർമ്മിക്കാൻ സാധിക്കുന്നു. കൂടാതെ, ആഭ്യന്തര സ്മാർട്ട്‌ഫോൺ നിർമ്മാതാക്കൾക്ക് നികുതിയിളവും തൊഴിൽ, പരിസ്ഥിതി മാനദണ്ഡങ്ങളിൽ ഇളവ് തുടങ്ങി അനവധി നേട്ടങ്ങൾ ഗവൺമെന്റ് തലത്തിൽ നിന്നും നേടാൻ അവർക്കു കഴിഞ്ഞു. 

രാജ്യത്തെ സാങ്കേതിക വ്യവസായം വളർത്തുകയെന്ന ലക്ഷ്യത്തോടെയുള്ള ചൈനീസ് സർക്കാരിന്റെ സംരംഭങ്ങളിൽ നിന്ന് ഷിയോമി, ഹുവാവേ, ZTE തുടങ്ങിയ നിരവധി ചൈനീസ് കമ്പനികൾക്ക് നേട്ടമുണ്ടാക്കാൻ കഴിഞ്ഞു.

നികുതിയിളവുകളും അയഞ്ഞ തൊഴിൽ, പരിസ്ഥിതി മാനദണ്ഡങ്ങളും ഉൾപ്പെടെ കമ്പനികൾക്ക് അനുകൂലമായ വ്യവസ്ഥകൾ വാഗ്ദാനം ചെയ്ത് രാജ്യത്തെ സ്മാർട്ട്ഫോൺ വ്യവസായത്തെ പ്രോത്സാഹിപ്പിക്കുന്നതിന് ചൈനീസ് സർക്കാർ കഠിനമായി പരിശ്രമിച്ചു.  

തായ്‌പേ ആസ്ഥാനമായുള്ള സ്റ്റാൻഡേർഡ് ആന്റ് പുവേഴ്‌സിന്റെ അനുബന്ധ സ്ഥാപനമായ തായ്‌വാൻ റേറ്റിംഗ്സ് കോർപ്പറേഷൻ സെപ്റ്റംബറിൽ പ്രസിദ്ധീകരിച്ച ഒരു റിപ്പോർട്ടിൽ, “ചൈനയുടെ വിപുലമായ ഐടി വിപണി, സർക്കാർ അനുകൂല നയങ്ങൾ, സാങ്കേതിക ശേഷി എന്നിവ ചൈനയുടെ സാങ്കേതിക മേഖലയുടെ വ്യാപനത്തെ പിന്തുണയ്ക്കുന്നത് തുടരും എന്നു വ്യക്തമാക്കുന്നു.

ഈ കമ്പനികളെ അന്തർ‌ദ്ദേശീയമായി വളരാൻ‌ സഹായിക്കുന്നതിനായി ചൈനീസ് പ്രീമിയർ‌ ആയ ലി കെകിയാങ്‌ ഈ വർഷം ആദ്യം സർക്കാരിൻറെ 10 വർഷത്തെ “മെയ്ഡ് ഇൻ ചൈന 2025” പദ്ധതി വെളിപ്പെടുത്തി, ഇത് രാജ്യത്തിന്റെ അതിർത്തിക്കുള്ളിൽ‌ ഉൽ‌പാദിപ്പിക്കുന്ന ഉൽ‌പ്പന്നങ്ങൾ‌ പ്രോത്സാഹിപ്പിക്കുകയെന്ന ചൈനയുടെ നയം വ്യക്തമാക്കി. നവീകരണം, ഹരിത വികസനം, ഗുണനിലവാരമുള്ള വസ്തുക്കൾ എന്നിവയിൽ ശ്രദ്ധ കേന്ദ്രീകരിച്ച് ലോക സാങ്കേതിക ശക്തിയിലേക്ക് ഒന്നാമതാകുക എന്ന ലക്ഷ്യത്തിൽ ഊന്നിയുള്ള ചൈനീസ് സർക്കാരിന്റെ ദീർഗവീക്ഷണം കൂടി ഇതു കാട്ടിത്തരുന്നു.

INDIAN SMART PHONE MARKET SHARE  (2016-19)

ഇന്ത്യൻ സ്മാർട്ട്ഫോൺ കമ്പനികൾ ബിസിനസിൽ നിന്ന് പുറത്തുപോയതിന്റെ 10 പ്രധാന കാരണങ്ങൾ

1. ലാഭത്തിൽ മാത്രം ശ്രദ്ധ കേന്ദ്രീകരിച്ചു:

മിക്ക ഇന്ത്യൻ സ്മാർട്ട്‌ഫോൺ ബ്രാൻഡുകളും പ്രവർത്തിക്കുന്നത് 20-30% ലാഭത്തിൽ.  ചൈനീസ് കമ്പനികളുമായി താരതമ്യപ്പെടുത്തുമ്പോൾ ഇത് വളരെ വലുതാണ്.

ഇന്ത്യൻ കമ്പനികൾ കഴിയുന്നത്ര വേഗത്തിൽ പണം സമ്പാദിക്കാൻ ശ്രമിച്ചു. പക്ഷേ, ഈ ആശയം പൂർണ്ണമായും പരാജയപ്പെട്ടു.

ഉപയോക്താക്കളെ കൂടുതൽ നേടുക എന്നതായിരുന്നു ചൈനീസ് കമ്പനികളുടെ ലക്ഷ്യം അതിനാൽ തന്നെ എല്ലാ ചൈനീസ് ബ്രാൻഡുകളും തങ്ങളുടെ ബിസിനസ്സ് നടത്തുന്നത് 5% ലാഭത്തിൽ മാത്രമാണ്.

2. നവീകരണം:

ഇന്ത്യൻ സ്മാർട്ട്‌ഫോൺ കമ്പനികൾ ചൈനീസ് കമ്പനികളെ നേരിടുന്നതിനായി പുതിയതായി ഒരു മാറ്റത്തിനും തയ്യാറായില്ല.

പ്ലാന്റുകളുടെ നിർമ്മാണം, ഗവേഷണം, വികസനം എന്നിവയിൽ നിക്ഷേപിക്കാൻ മൈക്രോമാക്സ്, ലാവ, കാർബൺ എന്നിവയ്ക്ക് അക്കാലത്ത് മതിയായ പണമുണ്ടായിരുന്നു. 

ചൈനീസ് നിർമ്മാതാക്കൾ അവലംഭിച്ച MIUI പോലെ ആൻഡ്രോയിഡ് പ്ലാറ്റഫോം ഉപയോഗപ്പെടുത്തി കൂടുതൽ മെച്ചപ്പെട്ട സോഫ്റ്റ്‌വെയർ വികസിപ്പിക്കാൻ ഇവർക്ക് കഴിയുമായിരുന്നു.

പക്ഷേ, ഈ കമ്പനികൾ ഒന്നും ചെയ്തില്ല.

3. ഉപഭോക്താക്കളുടെ ആവശ്യങ്ങൾ മനസ്സിലാക്കൽ

ക്ലോക്ക്, അലാം, ടോർച് തുടങ്ങിയ ലഘു ഫീറ്റ്ച്ചറുകളിൽ നിന്നും ബാങ്ക്, ഫോട്ടോ സ്റ്റുഡിയോ, കമ്പ്യൂട്ടർ തുടങ്ങിയവയിലേക്കുള്ള മൊബൈൽ ഫോണിന്റെ പരിണാമം വളരെ പെട്ടെന്നായിരുന്നു. എന്നാൽ ദിനം പ്രതി എന്നോണമുള്ള ഈ മാറ്റങ്ങളുടെ ഭാഗവത്താകാൻ ഇന്ത്യൻ കമ്പനികൾ പ്രാപ്തരായിരുന്നില്ല.

 4. കുറഞ്ഞ ഗുണനിലവാരമുള്ള ഉൽപ്പന്നങ്ങൾ:

സാധാരണയായി ചൈനീസ് ഉൽപ്പന്നങ്ങളെ നമ്മൾ ഗുണനിലവാരമില്ലാത്തവ ആയാണ് കണ്ടിരുന്നത് എന്നാൽ ഇവിടെ സംഭവിച്ചത് മറിച്ചാണ് 

ചൈനീസ് ബ്രാൻഡുകളായ ഷിയോമി, ഓപ്പോ, വിവോ, വൺപ്ലസ് എന്നിവ ഉയർന്ന നിലവാരമുള്ള ഉൽപ്പന്നങ്ങൾ കുറഞ്ഞ നിരക്കിൽ നൽകാൻ തുടങ്ങി.

മറുവശത്ത്, ചൈനീസ് ബ്രാൻഡുകളുമായി താരതമ്യപ്പെടുത്തുമ്പോൾ ഇന്ത്യൻ ബ്രാൻഡുകളുടെ ഗുണനിലവാരം വളരെ മോശമായിരുന്നു.

5. ആഗോള വിപണിയിലെ പിന്തള്ളപ്പെടൽ

നോക്കിയയുടെ പതനത്തിനുശേഷം കഴിഞ്ഞ ഏതാനും വർഷങ്ങൾ വരെ ഇന്ത്യൻ സ്മാർട്ട് ഫോൺ കമ്പനികൾ പല വിദേശ വിപണികളിലും സജീവമായിരുന്നു. എന്നാൽ ലാവാ തുടങ്ങിയ ഏതാനും കമ്പനികൾ മാറ്റിനിർത്തിയാൽ മറ്റെല്ലാ ബ്രാൻഡുകളും വില, ഗുണമേന്മ, പുതുമ, സാങ്കേതികവിദ്യ തുടങ്ങി പലവിധ കാരണങ്ങളാൽ ആഗോള വിപണിയിൽ നിന്നും പിന്തള്ളപ്പെട്ടു.

6. ഇന്ത്യയിൽ നിർമ്മിക്കുക:

ഇന്ത്യൻ സർക്കാരിന്റെ "മെയ്ക്ക് ഇൻ ഇന്ത്യ" പ്രകാരം, ചൈനീസ് കമ്പനികൾ ഇന്ത്യയിൽ അസംബ്ലിംഗ് പ്ലാന്റ് സൃഷ്ടിക്കാൻ തുടങ്ങി അത് പല ചൈനീസ് കമ്പനികളുടെ നികുതി, ഗതാഗത ചെലവ് എന്നിവ ഗണ്യമായി കുറച്ചു .

ഇന്ത്യൻ ബ്രാൻഡുകൾക്ക് ഈ വസ്തുത മനസ്സിലായില്ല.  അവർ ചൈനയിൽ ഫോണുകൾ നിർമ്മിക്കുന്നത് തുടർന്നുകൊണ്ടിരുന്നു.

7. സാങ്കേതിക വിദ്യയിലെ കുതിച്ചുചാട്ടം

ദിനം പ്രതി എന്നതിൽ നിന്നു മണിക്കൂറുകളിൽ എന്ന തലത്തിലേക്ക് സാങ്കേതികവിദ്യയിൽ മാറ്റങ്ങൾ സംഭവിച്ചുകൊണ്ടിരുന്നു, അതിനാനുപാതികമായ രൂപത്തിലും ഭാവത്തിലും സ്മാർട്ഫോണുകളും മാറിക്കൊണ്ടിരുന്നു.

കാമറ ഒന്നിൽ നിന്നും മൂന്നിലേക്കും നാലിലേക്കും മാറി, ബാറ്ററിയുടെ ശക്തി മണിക്കൂറുകളിൽ നിന്നും ആഴ്ചകളിലേക്കും, ഡാറ്റ യുടെ ശേഖരണ ശേഷി ജിഗാ ബൈറ്റിൽ നിന്നും ടെറാബൈറ്റിലേക്കും, ഡാറ്റാ കൈമാറ്റത്തിന്റെ വേഗത പതിന്മടങ്ങിലേക്കും, ലഭ്യമായ ആപ്പ്ളിക്കേഷനുകളുടെ എണ്ണം ലക്ഷങ്ങളിലേക്കും മാറി. ഇതിനെല്ലാം ആനുപാതികമായ മാറ്റങ്ങൾ വരുത്തുന്നതിന് ഇന്ത്യയിൽ ലഭ്യമായ സാങ്കേതികവിദ്യ പരിമിതമായിരുന്നു.

8. ചൈനീസ് നിർമ്മാണം:

ഇന്ത്യൻ സ്മാർട്ട്‌ഫോൺ ബ്രാൻഡിന്റെ പരുഷമായ യാഥാർത്ഥ്യം അവർക്ക് ഒരു തരത്തിലുള്ള നിർമാണ പ്ലാന്റും ഇല്ലായിരുന്നു എന്നതാണ്.

LAVA തുടങ്ങി ചില കമ്പനികൾ ഒഴിച്ചുനിർത്തിയാൽ മറ്റെല്ലാ കമ്പനികളും   ചൈനീസ് നിർമ്മാതാക്കളിൽ നിന്ന് ഫോണുകൾ വാങ്ങുകയായിരുന്നു. ഫോണുകൾക്ക് ബ്രാൻഡിംഗ് നൽകിക്കൊണ്ട് അവർ ഇന്ത്യയിൽ ഫോണുകൾ വിറ്റഴിച്ചു.

9. റിലയൻസ് ജിയോ 4 ജി:

എല്ലാ ഇന്ത്യൻ സ്മാർട്ട്‌ഫോൺ ബ്രാൻഡുകളും 2018 ഓടെ ഇന്ത്യയിൽ 4 ജി എത്തുമെന്ന് പ്രതീക്ഷിച്ചിരുന്നു. എന്നാൽ, റിലയൻസ് ജിയോ രാജ്യത്ത് 4 ജി കണക്റ്റിവിറ്റി അതിവേഗം വ്യാപിപ്പിച്ചു.

അതിനാൽ ഇന്ത്യൻ കമ്പനികൾ 4 ജിക്ക് തയ്യാറായിരുന്നില്ല. വലിയ തീരുമാനമെടുക്കുന്നതിന് മുമ്പ്, ഷിയോമി, ഓപ്പോ, വിവോ, വൺപ്ലസ് എന്നിവ ഇതിനകം വിപണി പിടിച്ചെടുക്കാൻ തുടങ്ങിയിരുന്നു.

10. സർക്കാരുകളുടെ ദീര്ഘവീക്ഷണത്തിലെ പാളിച്ചകൾ 

ലോകവ്യാപാര യുദ്ധത്തിന്റെ ഭാഗമാകാൻ തയ്യാറെടുക്കുന്ന ഇന്ത്യക്കു നോക്കിയ യുടെ തകർച്ചയിലും, ആൻഡ്രോയിഡിന്റെ ജനപ്രീതിയിലും മുളച്ചു വന്ന ഇന്ത്യൻ സ്മാർട്ട് ഫോൺ ഉൽപ്പാതകർക്കു ലോകത്തിന്റെ തുടിപ്പും, ആവശ്യവും മനസിലാക്കി നിർമാണ യൂണിറ്റ് എന്നതിന് അപ്പുറം ചൈനീസ് മാതൃകയിൽ സർക്കാർ തലത്തിൽ നടപ്പാക്കേണ്ടിയിരുന്ന വികസന പ്രവർത്തനങ്ങളുടെ ദീർഗവീക്ഷണമില്ലായ്മ തീർച്ചയായും ഇന്ത്യൻ സ്മാർട്ട് ഫോൺ നിർമാതാക്കളെ നിഷ്പ്രഭ മാക്കുന്നതിലെ ഒരു പ്രധാന പങ്കു തന്നെ എന്ന് പറയേണ്ടി വരും.

BY
SMIJAY GOKULDASAN
+91 9061118343